“ အားလုံးအတွက် ကုရ်အာန် ” - ၈

“ အားလုံးအတွက် ကုရ်အာန် ” - ၈
***************************
ကုရ်အာန် အာဂုံဆောင်ထိန်းသိမ်းမှု သမိုင်း
======================
တမန်တော်မြတ်(ဆွ)နှင့် သူ၏ရဲဘော်ရဲဖက်များ၏အစဉ်အလာအရ ကမ္ဘာတစ်ဝှန်း မုစ်လင်မ်တို့သည် ကုရ်အာန်စာပိုဒ်များကို နည်းများမဟူ အာဂုံဆောင်ခြင်း (အလွတ်ကျက်ခြင်း) ကို အစဉ်တစိုက် ပြုကျင့်လာခဲ့ကြသည်။ မရေတွက်နိုင်လောက်သော မုစ်လင်မ်တို့သည် ကုရ်အာန်၏အစိပ်အပိုင်းများစွာကို နှုတ်ငုံရရှိထားကြပြီး အချို့မှာမူ ကျမ်းဂန်တစ်စောင်လုံးပင် အာဂုံဆောင်ထားနိုင်ကြ၏။ ယင်းသို့ ကျမ်းတစ်စောင်လုံး အာဂုံဆောင်ထားနိုင်သူအား ဟာဖိဇွ် ဟုလည်းကောင်း၊ ကာရီ (အများနာမ် - ကုရာ့အ်)ဟုလည်းကောင်း၊ ကုရ်အာန်ကို ထိန်းသိမ်းစောင့်ရှောက်သူများဟုလည်းကောင်း ဂုဏ်ပြုခေါ်ဝေါ်ကြပေသည်။
ဟာဖိဇ်ွများက အခြားသူများ ကုရ်အာန်နှုတ်တိုက်ကျက်မှတ်ရန် ကူညီဆောင်ရွက်ရေးတာဝန်ကို ယူကြရ၏။ ဤသင်ပေးသင်ယူအစဉ်အလာ၏ အထက်ကွင်းဆက်မှာ တမန်တော်မြတ်(ဆွ)အထိ ရောက်ရှိ၏။

ကောင်းကင်တမန် ဂျိဗ်ရီးလ်(အလိုင်)၏ပြသမှုဖြင့် တမန်တော်မြတ်က ကုရ်အာန်ကို အာဂုံဆောင်တော်မူခဲ့၏။ ကိုယ်တော်မြတ်၏သင်ကြားပို့ချမှုဖြင့် ဆွေသဟာများက ကုရ်အာန်ကို အာဂုံဆောင်ခဲ့ကြ၏။ ထိုဆွေသဟာများ၏ သင်ကြားပြသမှုဖြင့် နောက်ထပ် မျိုးဆက်သစ်မုစ်လင်မ်လူငယ်များမှ အာဂုံဆောင်ခဲ့ကြပြန်သည်။ သို့နှင့် ဤနှုတ်ရေးအစဉ်အလာမှာ ယနေ့ထက်တိုင် စဉ်ဆက်မပြတ်ခဲ့ခြင်းဖြစ်လေသည်။
အကြင်သူသည် ဆရာတစ်ဦးဦး၏အထောက်အကူဖြင့် အာဂုံဆောင်နိုင်ပြီဆိုလျှင် ထိုသူ (ဝါ) ထိုသူမထက် ဝါစဉ်ကြီးသော အာဂုံဆောင်ထားသူတစ်စုရှေ့မှောက်၌ အစစ်ဆေးခံရ၏။ ဟာဖိဇ်ွတစ်ဦးဦးက ကျမ်းမြတ်ကုရ်အာန်၏ စာပိုဒ်တစ်ခုခုကိုရွေးချယ်ပြီး ပထမဆုံးစာကြောင်းအား အစဖော်ရွတ်ဖတ်ပြသည့်အခါ အစစ်ဆေးခံရသူက ထိုစူရဟ်၏စာပိုဒ်အဆုံးအထိ သို့မဟုတ် စစ်ဆေးသည့်အုပ်စုမှ ကျေနပ်သည့်နေရာအထိ ဆက်လက်ဖတ်ရွတ်ပြရသည်။ ဤသို့ဖြင့် တစ်ပိုဒ်ပြီးတစ်ပိုဒ် ကောက်သင်းကောက် ကောက်နှုတ်ဖတ်ရွတ်စေလေ့ရှိကြ၏။
မုစ်လင်မ်နိုင်ငံအများစု၌ ယင်းသို့ စစ်ဆေးစမ်းသပ်မှုကို အပတ်စဉ်သောကြာနေ့တိုင်း နိုင်ငံတော်ရုပ်မြင်သံကြားမှ ထုတ်လွှင့်ပြသလေ့ရှိ၏။ ဤသည်မှာ မုစ်လင်မ်တို့သည် မိမိတို့၏ကျမ်းဂန်ကျမ်းမြတ်အား ထိန်းသိမ်းစောင့်ရှောက်လျက်ရှိကြောင်း ပြဆိုနေသော မဟာအံ့ဖွယ်အထောက်အထားကြီးပင် မဟုတ်ပါသလော။

ကုရ်အာန်၏ အရဗီစကားကို ထိန်းသိမ်းခြင်း
======================
ဘာသာစကားဟူသည် ယဉ်ကျေးမှုအုပ်စုအချင်းချင်း၏ ဆက်သွယ်ရေးနည်းလမ်း ဆိုသည်ထက်
'' လူတို့၏လောကအမြင် နှင့် ယဉ်ကျေးမှုနှလုံးသားဝယ် လဲလျောင်းနေသောအရာ '' ဟုဆိုက ပိုမှန်ပေလိမ့်မည်။ အရဗီဘာသာစကားသည် ကျမ်းထွက်အဓိပ္ပာယ်နက်ရှိုင်းမှုတွင် ကမ္ဘာ့ဘာသာစကားများအလယ် ယှဉ်ဖက်မရှိ ထူးခြားလှကြောင်း ကုရ်အာန်ပညာရှင်များက သုံးသပ်တင်ပြထားကြ၏။
Bible (အင်န်ဂျီးလ်)ကျမ်းဂန်၏ မူလဘာသာစကားဖြစ်သော ဟီးဘရူး နှင့် အာရမိုက် မှသည် ဂရိ၊ လက်တင် နှင့် အခြားဘာသာစကားများအသွင်သို့ ပြောင်းလဲအသုံးပြုလိုက်သည်နှင့်ဆန့်ကျင်စွာ - မုစ်လင်မ်တို့က ကုရ်အာန်၏မူလဘာသာစကားဖြစ်သော အရဗီအတိုင်းပင် ထိန်းသိမ်းထားကြကုန်၏။ ဘာသာပြန်ဆိုခြင်းမှ ထွက်ရှိလာသော အနက်အဓိပ္ပာယ်မှာ မူလကျမ်းထွက်ဆိုလိုချက်အပေါ် ခြုံငုံမှုအပြည့်အဝ မပေးနိုင်ကြောင်း မုစ်လင်မ်တို့မှ ခံယူထားကြပေသည်။ သို့ဖြစ်ရာ ကျမ်းဂန်များ၌ ကုရ်အာန်ဘာသာပြန်များကို မူရင်းအရဘီစာသားများနှင့် ဘေးချင်းယှဉ်ပြီး ဖော်ပြကြခြင်းဖြစ်သည်။ ထိုသို့သောကျမ်းဂန်များကို ကုရ်အာန် ဟူသော စာသားသက်သက်ဖြင့် မခေါ်ဆိုဘဲ ကျမ်းမြတ်ကုရ်အာန်၏အဓိပ္ပာယ်ပြန်ဆိုမှုကျမ်း / ကုရ်အာန်ဘာသာပြန်ကျမ်း ဟုသာ အမည်ပေးထားကြလေသည်။

ကုရ်အာန်အခြေပြု အနုပညာများ
=================
အစ္စလာမ့်ယဉ်ကျေးမှု နှင့် မုစ်လင်မ့်ရပ်ဝန်းအတွင်း ကျမ်းတော်မြတ်ကုရ်အာန်ကို ကိရာအသ် တည်း ဟူသော ခန့်ညားလှပစွာဖတ်ရွတ်သရဇ္ဈာယ်ခြင်းဖြင့်လည်းကောင်း၊ ကုရ်အာန်၏ဘာသာစကားအလှအပကို လက်ရေးပညာဖြင့်လည်းကောင်း ဖော်ကျူးခြင်းခံရပေသည်။

(က) ဖတ်ရွတ်သရဇ္ဈာယ်ခြင်းအတတ်ပညာ နှင့် လမ်းညွှန်သင်္ကေတများ
ကုရ်အာန်ဖတ်ရွတ်သရဇ္ဈာယ်ခြင်း အတတ်ပညာကို အာရဗီစကားဖြင့် သဂ်ျဝီးဒ် ဟုခေါ်ဆိုသည်။ ကျောင်းသားလူငယ်တို့သည် ဤအတတ်ပညာကို ကျွမ်းကျင်သူဆရာများထံမှ သင်ယူလေ့လာကြရ၏။ မုစ်လင်မ်တို့သည် မိမိတို့ဘဝတစ်လျှောက်လုံး၌ ကျမ်းမြတ်ကုရ်အာန်ကို ရွတ်ဖတ်မပျက်သာ ရှိကြကုန်၏။
ကျမ်းမြတ်ကုရ်အာန်၌ ပင်ကိုယ်သဘာဝကပင် နဘေကာရန် နှင့် စည်းဝါးကျခြင်း ပါဝင်နေသောကြောင့် သံစဉ်လှလှထွက်ပေါ်ရန် ထင်သလောက် မခဲယဉ်းလှချေ။ ကျမ်းမြတ်ကုရ်အာန်ကို သန့်ရှင်းသော နှလုံးသား၊ စင်ကြယ်သောအတွေးအမြင်ဖြင့် ဖတ်ရွတ်လိုက်ပါက လှပသည့်သံစဉ်တစ်ရပ် အလိုလို ထွက်ရှိလာတတ်ပေသည်။ ထိုဖတ်ရွတ်သံသည် မုစ်လင်မ်တို့အဖို့ သာမန်မျှသာဖြစ်လင့်ကစား မုစ်လင်မ်မဟုတ်သူများအဖို့ကား တစ်သက်တာ မေ့မရအောင် နားစွဲသွားတတ်ပေသည်။
အလ္လာဟ်အရှင်မြတ်က တမန်တော်မြတ်(ဆွ)အား ကုရ်အာန်ကို ဖြေးညှင်းစွာ၊ ရှင်းလင်းပီသအောင် သတိထား၍ ဌာန်ကရိုဏ်းကျကျ ဖတ်ကြားသရဇ္ဈာယ်ရန် သင်ကြားပေးတော်မူခဲ့၏ (၇၃း၎)။ သဂ်ျဝီးဒ် အတတ်ပညာ၌ ဖတ်ရွတ်မှုနည်းနိသျှ လေးမျိုးရှိသည်။
(၁) ဟဿွ်ရ် - ပုံမှန်စကားပြောသည့်နှုန်းအတိုင်း ဖတ်ကြားခြင်း
(၂) သရ်သိလ် - နက်ရှိုင်းသောခံစားချက်ဖြင့် ဖြေးညှင်းစွာ ဖတ်ကြားခြင်း
(၃) သဂ်ျဝီးဒ် သဟ်ကိက် - ဖြေးညှင်းစွာဖတ်သော်လည်း အာရုံနစ်မျောမှု မရှိခြင်း ( သူတစ်ပါးကို သင်ကြားရာ၌ အသုံးပြုသည် )
(၄) သဂ်ျဝီးဒ် - နှေးကွေးခြင်း နှင့် ပုံမှန်အကြားရှိ ဟန်ချက်ဖြင့် ဖတ်ကြားခြင်း ( ဆွလာသ်ဝတ်ပြုမှုတွင် ဦးဆောင်သူမှ ဖတ်ကြားသည့်နည်းစံနစ် ဖြစ်သည် )

အဖတ်အရွတ်မှန်ကန်စေရေး လမ်းညွှန်သင်္ကေတများ
--------------------------------------------------------
ပုံနှိပ်ကုရ်အာန်တစ်စောင်အတွင်း ကြည့်လိုက်လျှင် လမ်းညွှန်သင်္ကေတအများအပြားကို တွေ့ကြရပေမည်။ ယင်းသင်္ကေတတို့သည် ကုရ်အာန်ဖတ်ရွတ်မှု မှန်ကန်အောင် ဂီတသင်္ကေတများအလား ထပ်တူထပ်မျှပင် လမ်းညွှန်ပေးနေပါ၏။
ဤသင်္ကေတများမှာ စာလုံးပေါင်း၏အသံထွက်ပီသစေရန် ကူညီပေး၏။ သို့ဖြင့် တစိုက်မတ်မတ် စည်းချက်ညီသွားသည့်အပြင် စကားလုံးရောထွေးမှုသည်လည်း မရှိတော့ချေ။ တဖန် ဖတ်ကြားနေသူများကို ရှည်လျားလှသည့် စာကြောင်းအတွင်း မည်သည့်နေရာ၌ တုန့်ဆိုင်းရမည်၊ မည်သည့်နေရာ၌ အသံမြှင့်ရမည်၊ မည်သည့်နေရာ၌ အသံနိမ့်ချရမည်ကို ပြောပြနေ၏။ သို့သာမက နားဆင်သူများအပေါ် သြဇာသက်ရောက်စေမည့် အဆွဲအငင် အဖြတ်အတောက်များကိုလည်း ညွှန်ပြလျက်ရှိပေသည်။
ရှေးခေတ် ကုရ်အာန်လက်ရေးမူများတွင် လမ်းညွှန်သင်္ကေတများ မပါရှိခဲ့ချေ။ အာရပ်မဟုတ်သော မုစ်လင်မ့်ဦးရေကြီးထွားအားကောင်းလာရာ၌ တဖြည်းဖြည်း လိုအပ်ချက်အသွင် ဖြစ်လာခဲ့၏။ ထိုအမှတ်သင်္ကေတများသည် အတိတ်နှင့်ပစ္စုပ္ပန်ရှိ အာရပ်မဟုတ်သည့် မုစ်လင်မ်အပေါင်းကို တိကျမှန်ကန်စွာဖတ်ရွတ်နိုင်အောင် အထောက်အကူပေးခဲ့/ပေးဆဲဖြစ်၏။ အာဂုံဆောင်သူဟာဖိဇ်ွများသည်လည်း ထိုသင်္ကေတများကို အလွတ်ကျက်မှတ်ထားရသည့်အပြင် ကျမ်းစာပိုဒ်တိုင်းဝယ် ၄င်းတို့အား အသုံးချနည်းကိုလည်း သိကျွမ်းထားရပေသည်။ သို့ဖြစ်ရာ ဤအမှတ်သင်္ကေတများဖြင့် ကိုယ်စားပြုထားသော ကုရ်အာန်ဖတ်ကြားသံမှာ ခံစားချက်အမျိုးမျိုးကို ဖြစ်ပေါ်လာစေပါသည်။
အလ္လာဟ်အရှင်မြတ်၏မုက္ခပါဌ်တော်များကို ဖတ်ကြားသရဇ္ဈာယ်မှုသည် လူသားတို့၏ နှလုံးသားတွင်းသို့ စူးနစ်သြဇာလွှမ်းစေ၏။ ကျမ်းမြတ်ကုရ်အာန်ဖတ်ကြားမှုနှင့်မှတ်သားမှု မရှိကုန်သော မုအ်မင်န်တို့၏နှလုံးသားကို လူသူကင်းမဲ့သောအိမ်ရာ ဟူ၍ တမန်တော်မြတ် မုဟမ္မဒ် (ဆွ)မှ တင်စားဖော်ပြထားပေသည်။
အသန်မာအထွားကြိုင်းဆုံးသော ကိုယ်တော့်နောက်လိုက်များသည်ပင်လျှင် ကုရ်အာန်စာသားများကို ကြားနာရသည်၌ ဒူးထောက်ထိုင်ကျသွားရကြောင်း ကျော်ကြားလှ၏။ ယင်းသို့ စူးရှထိရောက်မှုမျိုးကို မုစ်လင်မ်များစွာ တွေ့ကြုံခံစားရပေသည်။ ဖတ်ရွတ်မှုကို နားမဆင်ဘဲလျက် ကုရ်အာန်နားလည်မှုရသကို အပြည့်အဝ မရနိုင်ပါ။ အရဗီဘာသာစကား နားမလည်သည့်တိုင် ယင်းခံစားချက်မျိုးဖြစ်ပေါ်သွားရသည့် ကုရ်အာန်နားဆင်သူ မုစ်လင်မ်များလည်း ရှိကြပေသည်။

(ခ) လက်ရေးအတတ်ပညာ
အစ္စလာမ်မတိုင်မီ အာရေဗျရှိလူတို့သည် မိမိတို့၏နတ်ဘုရားရုပ်တုကို ကိုယ်တိုင်ဖန်တီးယူခြင်း၊ ပန်းချီရေးဆွဲခြင်းတို့ ပြုလုပ်ခဲ့ကြကုန်၏။ ၄င်းတို့နှင့်ဆန့်ကျင်လျက် ကိုးကွယ်ရာအရှင်သခင် နှင့် အရှင်မြတ်၏ တမန်တော်များကို မည်သည့်ရူပကာပုံဆောင်ချက်များဖြင့် အလျဉ်း မဖန်တီးရန် မုစ်လင်မ်တို့အား တားမြစ်ထားပေသည်။ ယင်းသို့ပြုလုပ်ခြင်းသည် သာသနာကို စော်ကားရာရောက်၍ ဖြစ်သည်။
လက်ရေးအတတ်ပညာသည် ဗျာဒိတ်စကား၏အလှတရားကိုဖွင့်ဆိုရန် အနုပညာမြောက်ပုံဟန်တစ်ရပ်အနေဖြင့် ထွန်းပေါ်လာခဲ့ခြင်းဖြစ်သည်။ ဤလှပသည့်အစဉ်အလာကို မုစ်လင်မ်ကမ္ဘာတစ်ဝှန်းမှ ဗလီဝတ်ကျောင်းနံရံ၌လည်းကောင်း၊ မက္ကဟ်ရွှေမြို့တော်ရှိ ကအ်ဗဟ် နှင့် ဂျေရုဆလင်ရှိ ကျောက်သားပေါင်းမိုးခုံး၌လည်းကောင်း၊ ကုရ်အာန်၏ စာမျက်နှာများပေါ်၌လည်းကောင်း အထင်အရှားတွေ့ရပေမည်။ ထို့နည်းတူ ကုရ်အာန်စာသား၏ လက်ရေးအနုပညာကို မုစ်လင်မ်တို့၏ နေအိမ်၊ ဆိုင်ခန်း၊ ကျောင်း၊ ဆေးရုံ အစရှိသည်တို့တွင်လည်း တွေ့မြင်နိုင်ပါ၏။
လက်ရေးအတတ်ပညာသည် အာရေဗျ၌ “စက္ခုများအတွက်ဂီတသံစဉ်” ဟု ကျော်ကြားလှပေ၏။ များသောအားဖြင့် စကားလုံးများကို လေးနက်လှပစွာ ပုံဖော်ထားလေ့ရှိ၏။ ရံဖန်ရံခါတွင် ဗလီဝတ်ကျောင်း သို့မဟုတ် ဒေါင်းကဲ့သို့ တိရစ္ဆာန်ပုံဟန်မျိုးဖြင့် စကားလုံးများကို အနုပညာမြောက်အောင် ပေါင်းစပ်ဖန်တီးထားတတ်ပေသည်။

အခန်း (၂ ) ပြီး၏။

xxxxxxxxxxxxxxxxxxxxx
(ဆက်လက်ဖော်ပြပါမည်)