“ အားလုံးအတွက် ကုရ်အာန် ” - ၁

“ အားလုံးအတွက် ကုရ်အာန် ” - ၁
***************************

အလျဉ်မပြတ် စာနာညှာတာထောက်ထားတော်မူသော အနန္တကရုဏာတော်ရှင်
အလ္လာဟ် အရှင်မြတ်၏ နာမံတော်ဖြင့် (အစပြုပါ၏)

မြန်မာပြန်ဆိုသူ ၏ ရင်လှိုင်းခတ်သံ
------------------------------------
ကျွန်တော်သည် မြန်မာပြည်ကိုချစ်သော မြန်မာပြည်ဖွားမြန်မာနိုင်ငံသားဖြစ်သည်။ မြန်မာနိုင်ငံမှ မုစ်လင်မ်တစ်ဦးဖြစ်သည်။ မြန်မာနိုင်ငံ၌ လူမျိုးစုံ၊ ဘာသာစုံနေထိုင်ကြသည်။ မည်သည့် လူမျုိုး မည်သည့်ဘာသာဝင် ဖြစ်စေ မြန်မာနိုင်ငံဖွားတို့သည် မေတ္တာတရား မခေါင်းပါးကြပါ။ စစ်မှန်သော မေတ္တာတရား၏နောက်ကွယ်၌ လွတ်လပ်ခြင်း နှင့် တရားမျှတခြင်းက ကိန်းအောင်းတည်ရှိနေစမြဲပင်။ လွတ်လပ်မှုနှင့်တရားမျှတမှုကို လက်ဝယ်ပိုင်ပိုင် ရရှိရန်အလို့ငှါ တိုင်းရင်းသား၊ နိုင်ငံသား၊ ဘာသာပေါင်းစုံ တို့သည် သက်ဆိုင်သည့်ကဏ္ဍအလျောက် သူ့ကျွန်ဘဝမှ အလွတ်ရုန်းလာနိုင်ခဲ့ပြီးဖြစ်၏။ အချို့ဖြစ်ရပ်များမှာ သမိုင်းတင်ခြင်းမခံရသော်လည်း မျိုးဆက်တစ်ဆက်၏ ကိုယ်ကျိုးစွန့်အနစ်နာခံမှုသည် နောင်လာမည့်မျိုးဆက်အလီလီအတွက် ''လွတ်လပ်ရေး'' ဟူသောအကျိုးကို ခံစားရရှိစေကြောင်း သမိုင်းကသက်သေပြုနေပါသည်။ အပြန်အလှန်နားလည်မှု နှင့် လေးစားအသိအမှတ်ပြုမှုတို့က ''မေတ္တာ နှင့် အင်အား'' အဖြစ် ရုပ်လုံးပေါ်လာလေ့ရှိပါသည်။ ယင်းရုပ်လုံး၏အလှပဆုံးကာလမှာ လွတ်လပ်ရေး တိုက်ပွဲဝင်အချိန်များဟု ပညာရှင်တို့၏ဆိုစကားကို အဆက်ဆက် လက်ဆင့်ကမ်းကြားနာမှတ်သားဖူးပါသည်။ မြန်မာနိုင်ငံဟူသောခေါင်းစဉ်အောက်၌ လူမျိုးပေါင်းစုံ ဘာသာပေါင်းစုံတို့၏ ညီညွတ်သွေးစည်းခဲ့မှုသည် နားထောင်ရသူကိုပင် ကြက်သီးဖြန်းဖြန်းထစေပါသည်။ ကျွန်တော်မမှီလိုက်သောခေတ်ရှိ ကျွန်တော်မတွေ့လိုက်ရသောမြင်ကွင်းအား ပြန်လည်လွမ်းမောတသမိပါသည်ဟု ဆိုလျှင် ကျွန်တော် လွန်ပါသလား !
''ငါးခုံးမတစ်ကောင်ကြောင့် တစ်လှေလုံးပုပ်ရသည်'' ''အများယောင်လို့သာ လိုက်ယောင်ရသည်၊ အမောင် တောင်မှန်းမသိမြောက်မှန်းမသိ'' ဟူ၍ အဖိုးတန်မြန်မာစကားပုံများ ရှိပါသည်။ ယင်းစကားပုံနှစ်ရပ်၏ပေါင်းစပ်ဖြစ်စဉ်ကို လက်ရှိသမယဝယ် မျက်ဝါးထင်ထင် မြင်နေရပါသည်။ အထူးသဖြင့် ဘာသာရေး/သာသနာရေး ကဏ္ဍ၌ဖြစ်သည်။။ နိုင်ငံတစ်ခု တည်ငြိမ်အေးချမ်းမှုအတွက် ဘာသာရေးတို့၏ကဏ္ဍမှာလည်း အရေးကြီးပေသည်။ သိမ်မွေ့လျောက်ပတ်စွာ ကိုင်တွယ်တတ်ပါမှ (ကောက်ရိုးမီးမဟုတ်သော) တည်ငြိမ်အေးချမ်းမှုကို ရေရှည်ဖြစ်ထွန်းစေပါသည် -
ဖွံ့ဖြိုးတိုးတက်မှုကို မြန်ဆန်စေပါသည်။ ကျွန်တော်ချစ်သောအမိမြန်မာပြည်အား ဘဝတစ်ဆစ်ချိုးမှာ တစ်ဆင့်မက ခုန်တက်သွားစေချင်ပါသည်။ ကမ္ဘာ့သက်တမ်းတစ်လျှောက် လူ့သမိုင်းကို လှန်လျောကြည့်ရှုလိုက်သောအခါ လူသားတို့၏ နှလုံးသားများကို ''ဘာသာရေးကိစ္စ''က အထိုးနှက်နိုင်ဆုံး နှင့် အလွှမ်းမိုးနိုင်ဆုံးဖြစ်ကြောင်း တွေ့ရပါသည်။ ဘာသာတရားအချင်းချင်း ချစ်ကြည်ရင်းနှီးမှု၏ အဓိကရန်သူတော်မှာ ''နားလည်မှုလွဲမှားခြင်း'' ပင်ဖြစ်ပါ၏။ ဘာသာတရားတိုင်း မတူညီသောအခြေခံယုံကြည်ချက် ကိုယ်စီ ရှိနေကြပါသည်။ မတူညီသဖြင့် ကွဲပြားနေရခြင်းဖြစ်သည်။ ကွဲပြားသည့်အချက်ကိုလည်း တူညီအောင် တန်းညှိ၍မရနိုင်ပါ။ ထို့ကြောင့် လွဲမှားစွာနားလည်ခြင်းထက် အပြန်အလှန် နားလည်မှုထားရှိခြင်း က မြန်မာပြည်သားတို့၏မေတ္တာရနံ့ကို လက်တွေ့သင်းပံျ့စေမည်ဟု ရိုးသားစွာ ယူဆယုံကြည်မိပါသည်။
ကျွန်တော်သည် ဤစာအုပ်ကို ရင်ခုန်စွာ ပြန်ဆိုရေးသားရာ၌ အထက်ဖော်ပြချက်များမှာ ကျွန်တော့် ရင်လှိုင်းခတ်သံ၏အကိုင်းအခက်တစ်ရပ်ဟု ဆိုချင်ပါသည်။ သေချာစွာ လေ့လာဖတ်ရှုကြသူများသည် ''အိပ်ရာနှိုး သံစဉ်ချိုလေးတစ်ပုဒ်'' ကဲ့သို့ ခံစားကြားယောင်မိစေချင်သည်က ကျွန်တော့်စေတနာဖြစ်ပါသည်။ တည်ဆောက်ပျိုးထောင်ရခြင်းမှာ ခက်ခဲကြန့်ကြာရသော်ငြား ဖျက်ဆီးခြင်းက အလွန်လွယ်ကူမြန်ဆန်တတ်ကြောင်း သတိသံဝေဂ ရရှိ၍လည်း ပါဝင်ပါသည်။
ဒုတိယရင်လှိုင်းခတ်သံသည် 'လူ' နှင့် 'မူ' ကို ကွဲပြားစေလို၍ဖြစ်ပါ၏။ အများစုမှာ လူနှင့်မူ တစ်ထပ်တည်းကျနေလေ့မရှိပါချေ။ ရံဖန်ရံခါ လူကသပ်သပ် မူကသပ်သပ် ဖြစ်လို့နေပါသည်။ လူကိုသာကြည့်၍ မူကိုဝေဖန်ခြင်း (နှင့်) မူကိုသာကြည့်၍ လူကိုဝေဖန်ခြင်းဖြင့် အမှန်တရား မရရှိနိုင်ပါ။ လောကဓမ္မ၌ အလင်းအမှောင်၊ အဆိုးအကောင်း၊ အမှားအမှန်၊ ဒုက္ခသုခ စသည်တို့မှာ ထာဝစဉ် ဒွန်တွဲနေသည်။ သို့ဖြစ်သောကြောင့် မိမိတို့၏ဝန်းကျင်ရှိ လူပုဂ္ဂိုလ်တစ်ဦး သို့မဟုတ် တစ်စုတစ်ဖွဲ့ကိုကြည့်ပြီး ထိုသူ သို့မဟုတ် ထိုသူတို့၏ဘာသာသာသနာအား သုံးသပ်ဝေဖန်ခြင်းက နည်းလမ်း မကျသလို အဖြေမှန်ထွက်လာမည်လည်း မဟုတ်ပါလေ။ မည်သည့်ဘာသာတရားကိုဖြစ်စေ အကဲဖြတ်လိုပါလျှင် ယင်းဘာသာတရား၏အခြေခံယုံကြည်ချက်များ၊ အယူအဆ၊ သွန်သင်မှု နှင့် နောက်ခံသမိုင်းများကို လေ့လာဆန်းစစ်အပ်ပေသည်။ သို့မှသာ အနှစ်သာရအစစ်အမှန်ကို ရရှိနိုင်မည်ဖြစ်သည်။ မတူညီသော ဘာသာတရားများ၌ တူညီသောဘုံအယူအဆ နှင့် စံနစ်အချို့ကိုလည်း မြေကြီးလက်ခတ်မလွဲ တွေ့မြင်နားလည်ရပေမည်၊ မုချ အကျိုးရှိစေပါသည်။ ပန်းဥယျာဉ် တစ်ခုအတွင်း ပန်းအမျိုးအစားစုံလင်ပါမှ - ဝေဆာလန်းဆန်းနေပါမှ သာယာတင့်တယ်ရှုမောဖွယ် ဖြစ်လာပါလိမ့်မည်။
တတိယရင်လှိုင်းခတ်သံမှာကား ကိုယ့်ပေါင်ကိုယ်လှန်ထောင်းသည့်အသံနှယ် ဖြစ်နေပါသည်။ မည်သို့ဆိုစေ မိမိ၏ဝေဒနာသက်သာလိုပါက မိမိအသားစိုင်နှင့်သွေးကြောအတွင်း ဆေးထိုးအပ်ကို အဝင်ခံနိုင်ရန်၊ အစူးခံနိုင်ရန် လိုအပ်ပေမည်။ တစ်ခါတစ်ရံမှာတော့ အပ်စူးသည့်နေရာတွင် အကျိတ်အဖု လေးဖြစ်လာတတ်၏။ ဝေဒနာပျောက်ကင်းသက်သာရေးသာ အဓိကဖြစ်ကြောင်း အမြင်ပွင့်စေလိုပါသည်။
အလ္လာဟ်အရှင်မြတ်၏ဗျာဒိတ်လမ်းညွှန် တည်းဟူသော ကျမ်းမြတ်ကုရ်အာန်သည် အစ္စလာမ်သာသနာ၏ ပင်မအသက်သွေးကြောကြီးဖြစ်ပါသည်။ ကျွန်တော်တို့မုစ်လင်မ်များထံ၌ ၄င်းဘဝလမ်းညွှန်မြေပုံကြီး လက်ဝယ်ရှိနေပါသည်။ မြေပုံ၏ဖော်ပြချက်၊ လမ်းညွှန်မှု၊ အမှတ်အသားများကို နားလည်အောင်မလေ့လာထားဘဲ မြေပုံချပ်ကိုကျစ်ကျစ်ပါအောင်ဆုပ်ကိုင်ထားပြီး မြင်ရာလမ်းသို့ လျှောက်လှမ်းနေယုံမျှဖြင့် လိုရာပန်းတိုင် ရောက်နိုင်မည် မဟုတ်ပါ။ မုစ်လင်မ်များအတွက်သာမက ကမ္ဘာ့လူသားထုတစ်ရပ်လုံးအတွက် ဘဝလမ်းညွှန်မြေပုံကြီးမှာ လက်တစ်ကမ်း၌သာရှိနေသော်လည်း ..... မြေပုံပါပန်းတိုင်သို့ အရောက်လှမ်းခရီးဆက်နိုင်အောင် ပြင်ဆင်မှုရိက္ခာတည်းဟူသော စွန္နဟ်/ ဟဒီးဆ်ကို အန္တိမ တမန်တော်မြတ် မုဟမ္မဒ်(ဆွ)မှ ဘဝနှင့်ရင်း၍ အဖက်ဖက်မှချပြပေးခဲ့သော်လည်း ... ကျွန်တော်တို့မှာ လေသံဖမ်းတရားနာနေဆဲ၊ ဗျောသံကြားတိုင်း ထ,ကနေဆဲပါတကား။ ဤအခြေအနေများမှ မဖောက်ထွက်နိုင်သေးသရွေ့ ကျွန်တော်တို့အဖို့ အစ္စလာမ့်အနှစ်သာရနှင့် ဝေးသထက်ဝေးလေပြီ။ ကိုယ်တိုင်က 'ဝေး'နေသဖြင့် သူတစ်ပါးကို ပြည့်ပြည့်ဝဝ 'ပေး'ရန် မည်သို့ဖြစ်နိုင်ပါအံ့နည်း။ အမြင်ကန်းခြင်း၊ အကြားကန်းခြင်းထက် နှလုံးသားကန်းခြင်းက ပိုမိုဆိုးဝါးပါသည် - နောင်တမလွန်၏အမင်္ဂလာအပေါင်းကို ဖိတ်ခေါ်ရာရောက်နေပါသည်။ ကုရ်အာန် နှင့် စွန္နဟ်အား နားလည်သိတတ်အောငကြိုးစားလေ့လာ၍ အကောင်အထည်ဖော်ကျင့်သုံးကြသူများအဖို့ ၄င်းတို့၏နှလုံးသား၌ စက္ခုတစ်စုံ ကိန်းဝပ်လာပါလိမ့်မည်။ ယင်းစက္ခုစွမ်းအားက မိမိတို့၏နောင်တမလွန်ဘဝကိုပင် ထွင်းဖောက်တွေ့မြင်စေမည် ဖြစ်ပေသည်။ (ကြည့် - ကုရ်အာန် ၂း၁၅၊ ၁၇း၇၂၊ ၂၇း၆၆)
''မုသားမပါ လင်္ကာမချော'' ဟူသည့် ဆိုရိုးရှိသော်လည်း ''လင်္ကာမချောလျှင်နေ၊ မုသားမပါစေနှင့်'' ဆိုသော ရိုးသားဖြူစင်ဖြောင့်မတ်လှသည့် အစ္စလာမ့်အတွေးအခေါ် ရရှိကြစေရန်လည်းကောင်း၊ မုစ်လင်မ်တို့အဖို့ သက်တမ်းမစေ့သေးသမျှ နောက်ကျသည်မရှိ ဟူသော အစ္စလာမ့်အယူအဆအရလည်းကောင်း ဤစာအုပ်ကို ဘာသာပြန်ဆိုရခြင်းတစ်ကြောင်း ဖြစ်ပါသည်။ ဤမျှဆိုလျှင် မြန်မာနိုင်ငံသူနိုင်ငံသားမုစ်လင်မ်များမှ ကျွန်တော်၏ရင်လှိုင်းခတ်သံကို အကူကိရိယာမပါဘဲ ကြားသိနားလည်လောက်ပြီဟု ထင်ပါသည်။
Sohaib Sultan ၏ The Koran for Dummies စာအုပ်ကို အမေရိကန်နိုင်ငံ Wiley Publishing Inc, Indiana မှ (၂ဝဝ၄)ခုနှစ်တွင် ထုတ်ဝေခဲ့သည်။ စတင်ထွက်ရှိသည့်နေ့မှ ယနေ့ထိ အစ္စလာမ့်ရေးရာစာအုပ်စာတမ်းများအနက် လက်မလည်အောင် အရောင်းရဆုံးစာရင်းဝင်ခဲ့သည်ဟု သိရပါသည်။ အထူးသဖြင့် မုစ်လင်မ်မဟုတ်သူများအကြား အထူးထင်ရှားသည်သာမက အစ္စလာမ်နှင့်ကုရ်အာန်ကျမ်းမြတ်အပေါ် အမြင်ရှင်း၍ ကြည်လင်လာကြပါသည်။
ဤကျမ်းပြုသူ၏အမည်ရင်းမှာ စုဟိုင်းဘ် နဇီးရ် စုလ်သွာန် Sohaib Nazeer Sultan ဖြစ်ပြီး အရှေ့အလယ်ပိုင်းဒေသ နှင့် အမေရိကန်နိုင်ငံ၌ ဟဒီးဆ်ပညာကို နှစ်အတန်ကြာအောင်ဆည်းပူးခဲ့သည်။ သူသည် အဆင့်မြင့်ပညာရှင်များထံ အစ္စလာမ့်ယုံကြည်မှု နှင့် ဥပဒေကဏ္ဍကိုလည်း လေ့လာသင်ကြားထားခဲ့သည်။ အင်ဒီယားနားတက္ကသိုလ်ကျောင်းသားဘဝက သာသနာဝင်အမျိုးမျိုးပါဝင်သော ဘလွန်မင်တန်လူ့အဖွဲ့အစည်း၏ လူထုဆက်ဆံရေးကဏ္ဍ၌ ဦးဆောင်လှုပ်ရှားခဲ့ပြီး ဒုဥက္ကဌ၊ ၄င်းမှ ဥက္ကဌအဖြစ်လည်းကောင်း - မုစ်လင်မ်ကျောင်းသားများသမဂ္ဂအတွက် ကျောင်းသားရေးရာအကြံပေးအဖြစ်လည်းကောင်း ဆောင်ရွက်ခဲ့သည်။ အင်ဒီယားနားပြည်နယ်တစ်ခွင် ဘာသာပေါင်းစုံ အပြန်အလှန် ဆွေးနွေးမှု အများအပြား၌ တက်ကြွစွာပါဝင်လှုပ်ရှားခဲ့ရာ ၉/၁၁ ဂယက်မှHealing Our Community ဟူသော အစီအစဉ်မှာလည်း အပါအဝင်တစ်ခုဖြစ်သည်။ Sohaib သည် ယဉ်ကျေးမှုအသီးသီးအပေါ် အလေးထား စွမ်းဆောင်မှုကြောင့် အင်ဒီးယားနားတက္ကသိုလ်မှဂုဏ်ပြုခဲ့ပြီး (၂ဝဝ၂)ခုနှစ်ဘွဲ့ကြိုအခမ်းအနား၌ ရှေ့ဆောင်ဝတ်ပြုသူအနေနှင့် ဖိတ်ကြားခံရသည်။ အီလီနွိုက်စ်ပြည်နယ်၊ ချီကာဂိုတွင်နေထိုင်လျက်ရှိ၍ အလွတ်တန်းဆောင်းပါးရှင်အဖြစ် နှောင်ကြိုးမဲ့စီမံကိန်း(Independent Project )များ၌ လုပ်ကိုင်ဆောင်ရွက်နေသည်။ အစ္စလာမ့်ယုံကြည်ချက် နှင့် လက်ရှိအခြေအနေအကြောင်း ဟောကြားပေးရန် ခရစ်ယာန်ဘုရားကျောင်းများ၊ ဂျူးဘုန်းတော်ကြီးကျောင်းများမှ သူ့အား ကြိမ်ဖန်များစွာ ဖိတ်ကြားခဲ့ကြသည်။ ယခုအခါ အမေရိကန်နိုင်ငံရှိ မုစ်လင်မ်-ခရစ်ယာန်ဆက်ဆံရေးအပတ်စဉ်ဆွေးနွေးခန်း၌ အစ္စလာမ့်ရေးရာသုတေသီအဖြစ် BBC အသံလွှင့်ဌာနတွင် လုပ်ကိုင်ပေးနေပါသည်။ အထူးသဖြင့် ၉/၁၁ ကာလနောက်ပိုင်း အစ္စလာမ်နှင့်ကုရ်အာန်အား အမြင်စောင်းမှုအပေါ် သူ၏အပြုသဘောဆောင် လက်တွေ့ဖြေရှင်းဆွေးနွေးချက်များကိုအခြေခံ၍ ဤကျမ်းကိုပြုစုခဲ့ခြင်းဖြစ်ကြောင်း သိရပါသည်။
The Koran(Qur'an) for Dummies သည် မုစ်လင်မ်မဟုတ်သူများအပေါ် အဓိက ဦးတည်ထားသည် ဟု ဆိုသော်ငြား သာမန်မုစ်လင်မ်များအတွက်လည်း ကုရ်အာန်ရေးရာနှင့်ပတ်သက်၍ အခြေခံမှသည် Interfaith Dialogue အဆင့်သို့တက်လှမ်းနိုင်သည်အထိ အကျိုးထူးနိုင်ပါသည်။ မိမိတို့၏အားထုတ်လေ့လာမှု၌ မူတည်နေပါလိမ့်မည်။ Intrafaith Dialogue အတွက်လည်း ဆိုစရာစကားများ ရရှိလာပါလိမ့်မည်။
ဤစာအုပ်တွင် မူရင်းရေးသားသူ၏တင်ပြချက်ကို အရှိအတိုင်း မြန်မာဘာသာသို့ဆီလျော်အောင် ပြန်ဆိုရေးသားထားပါသည်။ မလွဲမရှောင်သာထည့်သွင်းရသည့် မှတ်ချက်အနည်းငယ်မှအပ ကျွန်တော်၏ကိုယ်ပိုင်အာဘော်များ မပါဝင်ပါ။ ထိုနည်းတူ လူတန်းစားမရွေး ဖတ်ရှုနားလည်နိုင်ရန်အတွက် ရိုးစင်းသည့်အရေးအသားမျိုးဖြင့် ကြိုးစားတင်ပြထားပါသည်။ ပုထုစဉ်လူသားပီပီ အမေ့အမှား မကင်းလွတ်နိုင်ရကား မရည်ရွယ်မထင်မှတ်သည့် ချွတ်ယွင်းအားနည်းမှု နှင့် ထိခိုက်မှုများ တွေ့ရှိရပါလျှင် နားလည်ခွင့်လွှတ်ပေးကြပါရန်၊ ကျွန်တော့်ထက် ကျွမ်းကျင်တတ်မြောက်ကြကုန်သော အစ္စလာမ့်ပညာရှင်များမှလည်း ပြုပြင်တည့်မတ်ပေးကြပါရန် မေတ္တာရပ်ခံအပ်ပါသည်။
မုစ်လင်မ်မဟုတ်သူဖြစ်စေ မုစ်လင်မ်ဖြစ်စေ ကြီးငယ်မဟူ ကျားမ မရွေး ''ကုရ်အာန်'' အကြောင်းကို အရှိအတိုင်းလေ့လာသိရှိလိုသူများအတွက် ဤ “အားလုံးအတွက် ကုရ်အာန်” စာအုပ်သည် (ပြီးပြည့်စုံသည့်ကျမ်းတစ်စောင် မဟုတ်သော်ငြား) အတိုင်းအတာတစ်ရပ်အထိ အထောက်အကူ ရရှိပါစေကြောင်း၊ လူထုကောင်းကျိုးတစ်ရပ်ရပ် ပေါ်ထွန်းလာပါစေကြောင်း၊ ဘာသာတရားများအချင်းချင်း အပြန်အလှန်နားလည်လေးစားမှုများ ဖြစ်တည်လာပါစေကြောင်း ကောင်းမြတ်ဆုမွန် တောင်းခြွေလိုက်ရပါသတည်း။ အာမီးန် ( ဤဆုတောင်း ပြည့်ဝပါစေသောဝ် )
အားလုံးအတွက် ...
လောကီ့ အာဂန္တု
ဂျူလိုင်ရဲရင့်
၂ဝ၁၂ ခုနှစ် ၊ မတ်လ

xxxxxxxxxxxxxxxxxxxx

ကျမ်းမြတ်ကုရ်အာန်၏ ထူးခြားဝိသေသ ၃ ရပ်
=========================
၁။ နှုတ်အားဖြင့် အသံထွက်ရွတ်ဖတ်သရဇ္ဈာယ်ရသည့် အစဉ်အလာ
၂။ အကြောင်းအရာတစ်မျိုးတည်းကို တစ်သမတ်တည်းဖော်ပြခြင်းမဟုတ်သော နည်းလမ်း
၃။ လူ၊ နေရာ၊ ခေတ်ကာလ၏ရာဇဝင်ကျမ်းမဟုတ်ဘဲ ကိုယ်ကျင့်တရားဖြစ်စဉ်သမိုင်း

ကျမ်းမြတ်ကုရ်အာန်၏ ရည်ရွယ်ချက် ၅ မျိုး
=======================
၁။ ပဲ့ပြင်ဆုံးမလမ်းညွှန်ခြင်း
၂။ အမှားအမှန် ခွဲခြားမှု မှတ်ကျောက်
၃။ သတိပေးနှိုးဆော်ချက်
၎။ နာမ်ဝိဥာဉ်ဝေဒနာများကို ကုစားပေးခြင်း
၅။ လူမှုဝန်းကျင်ကို ပြောင်းလဲခြင်း ( ကုရ်အာန်အခြေတည်လူ့အဖွဲ့အစည်းဖြစ်ရေး )

ကျမ်းမြတ်ကုရ်အာန်မှ ပြဆိုသော ပင်မအကြောင်းအရာ ၇ ချက်
================================
၁။ ခဝပ်ကိုးကွယ်အပ်ရာ တစ်ဆူတည်းသော ဖန်ဆင်းရှင်အကြောင်း ( ဥပမာ - ကဏ္ဍ ၁၁၂ )
၂။ တမန်တော်များအကြောင်း ( ဥပမာ - ၃း ၈၄ )
၃။ ယုံကြည်ချက် နှင့် လုပ်ရပ်များ ( အီမာန် နှင့် အအ်မာလ် ) ( ဥပမာ - ၂း ၁၇၇ )
၎။ မနုဿတို့၏ ဘဝဖြစ်စဉ် ( ဥပမာ - ကဏ္ဍ ၁ဝ၃ )
၅။ (တရားမျှတမှုကိုပေါ်လွင်စေမည့်) တရားစီရင်ခြင်းနေ့တော် ( ဥပမာ - ကဏ္ဍ ၉၉ )
၆။ လူသားအချင်းချင်း ပတ်သက်ဆက်ဆံရေး ( ဥပမာ - ၄၉း ၁၃ )
၇။ လိင်ခွဲခြားမှုမရှိသော တန်းတူအခွင့်အရေး ( ဥပမာ - ၉း ၇၁ )

နိဒါန်း
===
ကျမ်းမြတ်ကုရ်အာန်သည် မုစ်လင်မ့်ဘဝ၊ မုစ်လင်မ့်ယဉ်ကျေးမှု၏ နှလုံးသည်းပွတ်၌ ရှိနေခဲ့သည်မှာ နှစ်ပေါင်း(၁၄ဝဝ)ကျော်နေလေပြီ။ ယနေ့ကမ္ဘာပေါ်ရှိ မုစ်လင်မ်တို့အတွင်း၌ရှိသော အစ္စလာမ်အခန်းကဏ္ဍ၏ ဖွင့်ဆိုချက်များ၊ အစ္စလာမ့်အတွေးအခေါ်နှင့် နိယာမများကို ခြေမြစ်တိကျစွာ သိလိုပါက ကျမ်းမြတ်ကုရ်အာန်ထဲမှာသာ ရှာဖွေတွေ့ရှိနိုင်ပါသည်။
ကျမ်းမြတ်ကုရ်အာန်သည် မုစ်လင်မ်များသာမက မုစ်လင်မ် မဟုတ်သူ အစ္စလာမ့်ရေးရာဆောင်ရွက်သူများ နှင့် အသိပညာရှင်များကပါ ကမ္ဘာပေါ်တွင် အသုံးပြုအများဆုံး၊ ၄င်းပြင် တလွဲအသုံးချမှုအများဆုံး ကျမ်းဂန်တစ်စောင်ဖြစ်သည်။ အနာဂတ်၏ဖြစ်လတ္တံ့သော ပဋိပက္ခများအပေါ် နိုင်နင်းပြေလည်စေရန်အလို့ငှါ ကျမ်းမြတ်ကုရ်အာန်၏ အခြေခံကျသည့် - မသိမဖြစ် သိရှိအပ်သည့်- အသိပေးထားပြီးဖြစ်သည့် အဆုံးအမဒေသနာများကို မလွဲမသွေ စံနစ်တကျ နားလည်ထားအပ်ပေသည်။
ကျမ်းမြတ်ကုရ်အာန်မှာ ပြင်ပရုပ်လောက နှင့် အတွင်းပိုင်းနာမ်လောက နှစ်ရပ်စလုံးအား တစ်သားတည်းဖြစ်အောင် ပေါင်းစည်းပေးရာပြီးပြည့်စုံသည့် ဘဝတည်ဆောက်မှုလမ်းစဉ်တစ်ရပ်ကို ပေးအပ်ထားပေသည်။ လူတစ်ဦးချင်းဖြစ်စေ၊ လူ့အသိုက်အမြုံတစ်ရပ်လုံးဖြစ်စေ ဝိဥာဏဆိုင်ရာ အဖိုးထိုက်ရတနာများအပြင် လူ့အဖွဲ့အစည်း၏ မဏ္ဍိုင်အရည်အသွေးများကို အထူးပင် မြင့်မားလာစေပါသည်။ ယနေ့ခေတ်၌ အစ္စလာမ်သည် ကမ္ဘာ့ဒုတိယမြောက် အကျယ်ပြန့်အကြီးမားဆုံးသာသနာ ဖြစ်ပြီး ကမ္ဘာ့မုစ်လင်မ်လူဦးရေမှာ (၁.၄) ဘီလီယံအထက် ရှိနေပြီဖြစ်သည်။ ကျွမ်းကျင်ပညာရှင်တို့၏အဆိုအရ အစ္စလာမ်သည် အမေရိကန်ပြည်ထောင်စု နှင့် ဥရောပတစ်ခွင်ဝယ် အမြန်ဆန်ဆုံး ဖွံ့ထွား ပျံ့နှံ့လျက်ရှိသော သာသနာဖြစ်ကြောင်း သိရလေသည်။
ကမ္ဘာ့မုစ်လင်မ်ထုတစ်ရပ်လုံး၏ တန်ဖိုးအထားဆုံးစာပေသည် ကုရ်အာန်ကျမ်းမြတ်ပင် ဖြစ်လေရာ အစ္စလာမ့်ယုံကြည်ချက်၊ မုစ်လင်မ့်လူ့အဖွဲ့အစည်းပေါ်ရှိ ကုရ်အာန်၏မြင်ကွင်းကျယ်ကို ကျမ်းမြတ်ကုရ်အာန်အတွင်းမှသာ ရှာဖွေဆည်းပူးလေ့လာအပ်ပါကြောင်း။
(ဆက်လက်ဖော်ပြပါမည်)။